Ditë të zeza” për lekun, vijon zhvlerësimi në këmbime

Edhe dita e djeshme ishte një ditë zhvlerësimi për lekun shqiptar në këmbimet valutore të kryera në Tiranë. Sipas Bankës së Shqipërisë, leku ka humbur terren në këmbimet me të gjitha valutat, me përjashtim të dollarit australian. Dollari amerikan, që kishte fituar 0.19 lekë një ditë më parë, ka marrë sërish 0.34 lekë dje; euro që kishte fituar 0.40 lekë, dje mori sërish 0.26 lekë; paundi britanik, i rivlerësuar dy ditë më parë me 1.37 lekë, fitoi terren me 0.23 lekë; franga zvicerane, që ishte rivlerësuar me 0.41 lekë, dje fitoi edhe 0.36 lekë të tjera, ndërkohë që vetëm ari dhe argjendi kanë humbur terren në shkëmbimet me arin, sipas kursit zyrtar, të shpallur nga Banka qendrore dje.Fakti është që kjo tendencë zhvlerësimi e lekut, e filluar që vitin e kaluar, vjen si pasojë e prurjeve më të pakta valutore nga emigrantët. Por, ndërkohë që statistikat zyrtare flasin për një rritje të fluksit të turistëve, dhe në përgjithësi të qytetarëve të huaj që vizitojnë Shqipërinë, i vetmi shpjegim i arsyeshëm për rritjen e kërkesës për euro, dollarë e paund është që vizitorët që vijnë nga jashtë Shqipërisë shpenzojnë shumë më pak para se më parë për pushimet e tyre. Nga fillimi i këtij viti, euro është rivlerësuar me 5.9% në këmbimet me lekun, ndërkohë që dollari ka reflektuar një dobësim të pozitës në tregjet botërore, por ka mbetur thuajse i pandryshuar në këmbimin me lekun. Sipas ekspertëve, problemet që mund të lindin nga kjo situatë kanë të bëjnë me shtrenjtimin e borxhit qeveritar, që paguhet në valutë të huaj, por edhe të kësteve të klientëve privatë për kreditë e marra. Po kështu, bilanci tregtar do të përkeqësohet më tej, ndërkohë që vetëm eksportuesit do të kenë përfitim.