Vjosa del nga shtrati, përmbyten gjashtë shtëpi

Reshjet kanë shkaktuar probleme në të gjithë vendin, Ministria e Brendshme përpiqet të qetësojë situatën, duke deklaruar se nuk ka vend për panik



VLORE - Lumi i Vjosës ka dalë nga shtrati, duke përmbytur dje në mëngjes qindra hektarë tokë bujqësore dhe duke përmbytur 6 shtëpi. Shirat e shumtë të rënë ditët e fundit, që do të vazhdojnë edhe ditën e sotme, kanë fryrë ujërat e lumit të Vjosës, duke shkaktuar daljen nga shtrati dhe vërshimin mbi tokat bujqësore. Në fshatin Cerven, lumi ka vërshuar në tokat bujqësore, duke shkaktuar përmbytje masive të tyre, ndërsa uji ka depërtuar në dy shtëpi.

Mësohet se tek Ura e Mifolit në Novoselë të Vlorës janë përmbytur katër shtëpi nga të njëjtat arsye. Orendi dhe pajisje elektroshtëpiake janë dëmtuar si pasojë e përmbytjeve, ndërsa mësohet se nuk ka dëme në njerëz. Banorët janë evakuuar nga banesat dhe pritet një përmirësim i situatës për rikthimin e tyre.

Në vendngjarje kanë mbërritur forca të policisë, ndërsa autoritetet lokale të urdhëruara nga ato qendrore kanë ngritur shtabin e emergjencës. Në orët e paradites, ujërat e lumit përbënin vërtet një rrezik të madh, por në mesditë intensiteti i reshjeve u ul dhe niveli i ujërave ra. Gjithsesi, banorët e kësaj zone kanë qenë të shqetësuar për mundësinë e rifillimit të reshjeve të dendura, që do të mund të rrisnin sërish nivelin e lumit. Aktualisht situata nuk paraqitet aspak optimiste. Qindra ha tokë bujqësore përgjatë lumit Vjosë në zgjatim të Fierit e Vlorës janë përmbytur. Sipas burimeve zyrtare, dalja e lumit Vjosë nga shtrati mbrëmjen e së martës ka bërë që të përmbyten tokat bujqësore në Kutë, Tojkan dhe Hambar të komunës Cakran, Kashishtë dhe Cerven të komunës Frakull dhe Ferras e Poro të komunës Levan.

Probleme në të gjithë vendin

Ministria e Brendshme ka deklaruar dje, se situata e krijuar nga moti i keq në të gjithë vendin nuk është alarmante dhe se strukturat e emergjencave civile po japin ndihmën e nevojshme për çdo rast problematik. Sipas Ministrisë së Brendshme, situata më problematike paraqitet në veri të vendit, ndërsa janë marrë të gjitha masat për t’u ardhur në ndihmë banorëve të këtyre zonave.

Por duket se vetë të dhënat që publikon kjo ministri e përgënjeshtrojnë këtë qetësi. Shumë problematik në Shkodër mbetet aksi rrugor që lidh Shkodrën me Dukagjinin, në vendin e quajtur Lotaj, si rezultat i shembjes së dheut në një gjatësi 80 metra. Situata e krijuar për shkak të ujërave në tokën bujqësore në këtë qark është në përmirësim të vazhdueshëm. Në Qarkun e Lezhës, si rezultat i reshjeve, janë ende të përmbytura sipërfaqe të tëra toke, veçanërisht në fshatin Barbullojë, komuna Kolsh. Në Qarkun e Korçës, nga reshjet e këtyre ditëve janë paraqitur disa probleme, kryesisht në dalje të ujërave në segmente të ndryshme të rrugëve, por ato janë eliminuar me shpejtësi. Për momentin është problem ngritja e nivelit të ujit në lumin Devoll.