ShBA-ja lanson pullë postare me imazhin e Nënë Terezës

Washington, 2 shtator - Posta amerikane ka njoftuar të mërkurën se më 5 shtator do të nxjerrë në treg një pullë të re për nder të Nënë Terezës. Në një njoftim të Shërbimit Postar të SHBA-së, thuhet se do të nderohet nobelistja e paqes së vitit 1979 për punën e saj humanitare.
“E njohur për mëshirën e saj për të varfrit dhe ata që vuajnë, Nënë Tereza, një murgeshë e vogël katolike dhe një qytetare nderi amerikane, u shërbeu të sëmurëve dhe nevojtarëve të botës për gati 50 vjet”, thuhet në këtë njoftim. Pulla e re me imazhin e bamirëses së madhe shqiptare, një portret i realizuar nga artisti i mirënjohur Thomas Blackshear, do të dalë në qarkullim në 5 shtator. Ish -presidenti amerikan Ronald Regan në vitin 1985 e nderoi Nënë Terezën me Medaljen Presidenciale të Lirisë, ndërsa në vitin 1997, Kongresi Amerikan e nderoi atë me Medaljen e Artë të Kongresit për kontributet e jashtëzakonshme përmes aktiviteteve humanitare dhe të bamirësisë.