Kurban Bajrami

E ne, pasi që jemi pranë një feste madhështore të Kurban Bajramit, vlen që t’i themi disa fjalë rreth kësaj feste dhe çka ka të bëjë me të.


I Dërguari i All-llahut, Muhammedi [sal-lall-llahu alejhi ve sel-lem], ka thënë: “Çdo popull i ka festat e veta, e festat e muslimanëve janë dy: Fitër Bajrami dhe Kurban Bajrami”.


E ne, pasi që jemi pranë një feste madhështore të Kurban Bajramit, vlen që t’i themi disa fjalë rreth kësaj feste dhe çka ka të bëjë me të.


Nga vetë fjala Kurban, kuptojmë se kemi të bëjmë me kurban, që do të thotë sakrificë për hir të All-llahut.
All-llahu i Madhërishëm në Kur’an thotë:

“Ne vërtet të dhamë ty shumë të mira (kevtherin). Andaj ti falu dhe prej kurban për hir të Zotit tënd!” (El-Keuther: 1-2)

“Thuaj: namazi im, kurbani im, jeta ime dhe vdekja ime janë thjesht për All-llahun, Zotin e botëve!” (El-En’am: 162)


Kurbani

Kurbani është kafshë që theret për hir të All-llahut gjatë ditëve të Bajramit. All-llahu i Madhërishëm në Kur’an thotë: “E Devetë (therjen e tyre për kurban) ua kemi bërë prej dispozitave të All-llahut, e ju prej tyre keni dobi, andaj përmendeni emrin e All-llahut...” (El-Haxh: 36)

Me prerjen e kurbanit shprehet devotshmëria ndaj All-llahut, ngase All-llahu nuk ka nevojë për mish e as për gjak. Ai në Kur’an thotë: “Tek All-llahu nuk arrin as mishi e as gjaku i tyre, por te Ai arrin bindja e juaj...” (El-Haxh: 37)



Dispozitat e therjes së kurbanit

Therja e kurbanit është vaxhib (obligim i domosdoshëm) për ata që kanë mundësi materiale, ngase Pejgamberi [sal-lall-llahu alejhi ve sel-lem] ka thënë: “Kush ka mundësi të ther kurban e nuk ther, mos t’i afrohet xhamisë sonë”.

Nga kjo nënkuptohet se atij i cili ka mundësi të ther kurban e nuk e bën këtë, nuk do t’i sjellë dobi as falja e namazit të tij (falja e namazit të Kurban Bajramit), pasi që e ka lëshuar një vaxhib. Po ashtu transmetohet nga Muhafel ibn Selim [radijall-llahu anhu] se ka thënë: Ishim me të Dërguarin [sal-lall-llahu alejhi ve sel-lem] në Arafat, e ai tha: “O ju njerëz, çdo familje e ka obligim të therë kurban për çdo vit”.



Cilat kafshë mund të theren për kurban?

Kafshët të cilat mund të theren për kurban janë: lopët, devetë, dhentë dhe dhitë.

Për të qenë i vlefshëm Kurbani duhet t’i plotësojë këto kushte: lopët duhet të kenë më shumë se dy vjet, devetë më shumë së pesë vjet, dhentë më shumë se gjashtë muaj, ndërsa dhitë më shumë se një vjet. Po ashtu, Pejgamberi [sal-lall-llahu alejhi ve sel-lem] ka thënë: “Katër lloje të kafshëve nuk mund të theren: kafsha e verbër, kafsha e sëmurë, kafsha e gjymtë, kafsha e çalë”.

Në therjen e një lope për kurban mund të marrin pjesë shtatë persona, në deve dhjetë persona, ndërkaq delja mund të theret për një person dhe familjen e tij. Transmetohet se ibn Abbasi ka thënë: “Kemi qenë me të Dërguarin [sal-lall-llahu alejhi ve sel-lem] në udhëtim kohën e Kurban Bajramit. Një deve e kemi therur për dhjetë persona, kurse një lopë për shtatë persona”.


Kur duhet therur kurbani?

Transmetohet nga Xhundeb ibn Sufjan el-Bexheli [radijall-llahu nahu] se ka thënë: E kam dëgjuar Pejgamberin [sal-lall-llahu alejhi ve sel-lem] duke thënë: “Ai i cili e ka therur kurbanin para se të falet, le ta zëvendësojë atë me një tjetër, ndërsa ai i cili nuk e ka therur ende, le ta therë”.


Mishi i kurbanit

Mishi i kurbanit është e preferuar që të ndahet në tri pjesë: më një pjesë gëzon të varfrit, një pjesë të afërmve, kurse pjesën tjetër e ndal për vete.


Çka preferohet të bëhet në ditën e Kurban Bajramit?

Në ditën e Kurban Bajramit është e preferuar të bëhen këto gjëra:



1. Të pastrohet trupi.
2. Të vishen rroba të reja dhe më të mirat.
3. Ditën e Kurban Bajramit është e preferuar që të mos hahet asgjë deri sa të theret kurbani dhe të hahet prej mishit të tij.
4. Të falet namazi i Kurban Bajramit.
5. Ndërrimi i rrugës gjatë kthimit në shtëpi (kur të kthehesh nga xhamia - falja e namazit Bajramit)
6. Të madhërohet All-llahu gjatë ditëve të Bajramit.
7. Është mirë që në këto ditë të organizohen lojëra dëfryese, kuize, shëtitje etj.
8. Të urohet Bajrami ndërmjet njerëzve.