Faqe e re për Gresa Behlulin

“Këto ditë jam në përgatitje për klipin tim më të ri, për këngën “Faqe e re”, me të cilën mora pjesë në festivalin “Kënga Magjike”. Klipi do të realizohet në Shqipëri nga produksioni ‘Maks production’, kështu që edhe filmimet rreth klipit do të bëhen atje”, kështu thekson mes tjerash, për “Infopress”, këngëtarja Gresa Behluli, ndërsa shpalos edhe angazhimet aktuale larg botës së artit muzikor.Kur flitet për një këngëtar apo aktor, imazhi i parë që pothuajse secilit i del para syve është skena ku ata interpretojnë. T’i paramendosh ata në një angazhim tjetër jashtë profesionit të tyre, apo më saktësisht në kuzhinë dhe në përgatitjen e ushqimit, duket krejt e largët dhe e paimagjinueshme. Por, në të shumtën e rasteve, jeta e tyre sillet edhe rreth kuzhinës e përgatitjeve të ndryshme në të. E tillë është edhe jeta e këngëtares Gresa Behluli. E kontaktuar nga “Infopress”, Gresa na tregoi se ndodhej në kuzhinë duke përgatitur një gjellë të preferuar, ani pse thotë se nuk është shumë e mirë në këtë ‘art’. “Nuk është se jam shumë e mirë në përgatitjen e ushqimit, por kur përgatis diçka i përkushtohem shumë. Më shumë angazhohem në kuzhinë atëherë kur më imponohet, më saktësisht kur mami nuk është në shtëpi, në të kundërtën, mami është ajo që gjithnjë kujdeset për ushqimin”, shprehet Gresa, ndërsa shton se kur i ‘futet’ përgatitjes së ushqimit, është një nga gjellët e preferuara të saj, që gjithnjë pason në tryezë.

Përgatis atë lloj ushqimi që më pëlqen më shumë

“Zakonisht përgatis ndonjë gjellë të momentit dhe atë lloj ushqimi që mua më pëlqen më shumë. E ëmbëlsirat më pëlqejnë më shumë t’i përgatis. Por, them se ia dal mjaft mirë në përgatitjen e shumë gjërave ushqimore”. E ata që zakonisht shijojnë ushqimin e Gresës janë dy motrat dhe vëllai i saj, të cilët gati të shumtën e herëve e urojnë për ushqimin e bërë. “Zakonisht dy motrave edhe vëllait u ka rastisë të ushqehen me ushqimin që unë e përgatis, dhe zakonisht u ka pëlqyer ajo që unë kam përgatitur për ta”.Por, nuk është vetëm përgatitja e ushqimit angazhimi aktual i saj. Gresa bën me dije se aktualisht është angazhuar mjaft shumë edhe në muzikë e këngë. “Këto ditë jam në përgatitje për klipin tim më të ri, për këngë “Faqe e re”, me të cilën mora pjesë në festivalin “Kënga Magjike”. Klipi do të realizohet në Shqipëri nga produksioni ‘Maks production’. Besoj që javën e ardhshme do të udhëtoj drejt Shqipërisë, pasi edhe xhirimet do të bëhen atje. Jam në pritje të skenarit të cilin duhet të ma dërgojnë nga “Maks production”, në mënyrë që të informohem sa më në detaje për klipin që do realizojmë. Ndërkohë, po merrem me përgatitjen e veshjes që do bartë në klip”.

Jam tip i qetë

Ndonëse jo në masë të madhe, edhe mbrëmjet e ndryshme muzikore zënë vend në agjendën e këngëtares. “Jam e angazhuar edhe nëpër mbrëmje të ndryshme muzikore, pasi tashmë i kam disa koncerte të kontraktuara, mirëpo koha aktuale është më e qetë sa u përket prezantimeve nëpër mbrëmje e koncerte të ndryshme, si për mua, ashtu edhe gati për të gjithë këngëtarët tjerë”. Ndërsa studimet, por edhe daljet e kohë pas kohe, kanë rëndësinë e tyre. Thotë se është duke i shkuar shumë mirë me studimet, ndërsa shkurti do pasojë me një provim për të. “Studimet po më shkojnë shumë mirë. Kam edhe një provim tani në shkurt dhe jam duke e përgatitur. E sa i përket kohës së argëtimit, sigurisht që ndaj kohë edhe për argëtim. Dal me shoqërinë time, ndërsa vendet që frekuentoj nuk dallojnë nga vendet e zakonshme të të gjithë të rinjve prishtinas. Mbrëmjeve dal më rrallë, pasi nuk më pëlqen jeta e natës. Jam tip më i qetë. Më shumë dal gjatë ditës”.

“Infopress”