Greqi, arratisen nga burgu 2 shqiptarë

Rreth orës 03:30 të mëngjesit të sotëm, janë arratisur nga burgu i sigurisë së lartë Koridhalos në Athinë, dy shqiptarë të moshës 27 dhe 33 vjeç.

Akuzat për të cilat ata mbaheshin në burg ishte për trafik droge. Arratisja ka ndodhur në të njëjtin burg ku dy vjet më parë shqiptari Alket Rizai u arratis me helikopter.

Policia greke ka deklaruar se është vënë në kërkim të dy shtetasve shqiptarë të cilët mësohet se kanë sharruar hekurat e dritareve të qelisë gjatë orëve të natës.

Pasi kanë dalë nga qelia përmes dritares, shqiptarët kanë zbritur murin deri në oborr duke u mbajtur me çarçafët që ishin zgjatur duke u lidhur me njëri-tjetrin.

Policia ka ndërrmarrë menjëherë një operacion mjaft të gjerë dhe deri tani nuk ka asnjë lajme për dy të arratisurit.

Ministri i Drejtësisë ka pezulluar nga puna shefin e burgut dhe gardianët të cilët bënin roje gjatë kësaj periudhe kur dy shqiptarët u arratisën.