Saranda

Saranda është qytet në Shqipërinë Jugore i vendosur në bregun e detit Jon. Është e vendosur në një shpat mali. Emri Saranda vjen nga një manastir i hershëm kristian që i kushtohet Dyzet Shenjtorëve (“Ágii Saránda” në greqisht, “Santi Quaranta” në italisht).
Më parë (në lashtësi) njihet në histori me emërtimin Onhezmi dhe shumë më vonë, gjatë pushtimit fashist italian të Shqipërisë, u quajt Porto Eda për nder të vajzës së Benito Mussolinit. Onhezmi në lashtësi ishte një qytet port, një nga portat ne mund ta quajmë të tillë, e cila bënte lidhjen e Ballkanit Perëndimor me vendet e Evropës Lindore. Një pikë strategjike ekonomike shumë e favorshme për ilirët.
Saranda është një qendër e rëndësishme turistike në Shqipëri. Burim kryesor i të ardhurave është turizmi dhe emigracioni. Pozita e saj gjeografike favorizon shumë bujqësinë dhe blegtorinë. Pasuria natyrore e Sarandës karakterizohet nga një numër i madh habitatesh natyrore, gjysmënatyrore dhe artificiale.
Ka një bimësi të larmishme tipike mesdhetare. Zona njihet për prodhimin e agrumeve dhe ullirit, ndërkohë që pemët frutore zënë rreth 30 për qind të sipërfaqes. Pasurisë bimore të Sarandës i shtohet edhe bimësia ujore e detit Jon. Në thellësitë e Jonit nuk mungojnë edhe koralet. Saranda ka një botë shtazore të pasur, si derri i egër, lepuri, çakalli, dhelpra, ujku, sorkadhja, thëllëza, rosa etj..