Kur nuk pajtohemi me prindërit

Mund të duket shumë e çuditshme, por debatet mes prindërve dhe adoleshentëve mund të kenë rezultate të mira për të ardhmen e këtyre të fundit. Sipas disa shkencëtarëve ata adoleshentë të cilët shprehin këndvështrimin e tyre me qetësi dhe me besim në vetvete në një debat me prindërit janë të aftë që këtë gjë ta bëjnë edhe mes shokësh.
Dhe pikërisht këta adoleshentë janë më të prirë më shumë për të kundërshtuar edhe kur i ofrohet një vepër jo e mirë nga ana e shoqërisë qoftë konsumimi i duhanit, alkoolit apo lëndë narkotike në krahasim me ata adoleshentë të cilët nuk debatojnë kurrë me prindërit e tyre.
Pjesa dërrmuese e adoleshentëve tanë janë temperament dhe shumë prej tyre ua kthejnë fjalën prindërve. Sipas Egzona Zeqirit, bashkëbisedimi me prindërit i ndihmon mjaft shumë, por në të shumtën e rasteve kur debaton për një temë të caktuar nuk lëshon rrugë.
“Jam mësuar që me prindërit e mi të flas hapur pa dorëza, në realitet shpeshherë biem edhe në kundërshtim kur debatojmë për një çështje të caktuar. Me nënën natyrisht se jam më e hapur, ndërsa nga babai kam pak më shumë frikë. Por, kur bëhet fjalë për një vendim timin të dëshiruar atëherë qoftë edhe me këmbëngulësinë time e realizoj”, thotë ajo. Egzona nuk e mohon faktin se në disa raste e tejkalon kufirin, por e kaplon temperamenti andaj nuk e kontrollon veten. Por, kjo nervoz nuk i zgjat shumë, brenda pak minutash menjëherë qetësohet dhe pendohet.
Sikurse Egzona ashtu edhe Petrit Syla është mjaft i vrullshëm në bisedat me prindërit. Megjithatë në disa raste vendimet i merr babai, ndërsa nëna nuk ia prish qejfin.
“Ka raste kur shpeshherë debatojmë me prindërit dhe nuk na përputhen mendimet, mirëpo kjo më ndodh me shumë me babin se sa me mamin. Ajo mundohet që mos të ma prishë dhe shumë herë mendimet e mia apo thënë më mirë propozimet e mia për një vendim të caktuar i pëlqejnë asaj. Ndërsa babin e kam më kundërshtar”, thotë ai.
Në ditët e sotme frika nga prindërit është shuar çdoherë e më shumë, të paktë janë ata të cilët pyesin prindërit për të marrë një vendim. Ndonëse mendimet e të dy palëve nuk përputhen në të shumtën e rasteve dhe kjo krijon një situatë jo të mirë mes raporteve prindër fëmijë. Erxhina Ismajli është mjaft këmbëngulëse dhe në të shumtën e rasteve mundohet që të mos ua prishë prindërve.
“Nganjëherë nuk më pëlqejnë mendimet e prindërve, por me dashje apo pa dashje më duhet t’i pranoj. Por, nuk mund të mohoj se nganjëherë ndodh që edhe t’ua kthej fjalën, sepse jam një tip shumë këmbëngulëse”, thekson ajo.
Prindërit duhet të pranojnë kur fëmijët i kthejnë fjalën në një debat, sidomos kur fëmijët kanë të drejtë apo kanë mendimin e tyre. Nëse adoleshentët mendojnë se nuk ka kuptim të kundërshtosh prindin, atëherë ata nuk do të kenë guximin për të kundërshtuar as shokët më të mëdhenj që i ofrojnë të hyjnë rrugëve jo të mira.
marre nga: /zeri.info/