Kur filloi baleti në Kosovë?

Baleti është ajo gjini artistike e cila i shpreh ndjesitë e saj nëpërmjet lëvizjeve të shoqëruara me muzikë, shfaqje skeniko-muzikore e trupës vallëzuese. Kjo shfaqje përcillet me skenografi dhe me kostume adekuate. Baza dramaturgjike është libretoja në bazë të së cilës edhe kompozohet përcjellja muzikore, e cila në raste të rralla ka këndim apo fjalë.
Baleti në Kosovë është formuar në vitin 1972 në Prishtinë, në Teatrin Kombëtar të Kosovës. Njëzet e shtatë balerinët e parë të Trupës së Baletit të Kosovës mbaruan shkollën e baletit në Shkup, Maqedoni. Që nga viti 1972 deri në vitin 1990 ata me sukses u prezantuan para publikut deri në largimin nga forcat serbe ne vitin 1990.
Pas luftës në Kosovë, dhe pas afro dhjetë vjetësh të mosfunksionimit të Trupës së Baletit në Kosovë, hapet shkolla e parë e Baletit, në vitin 2000. Iniciativa për hapjen e kësaj shkolle u mor nga Ahmet Brahimaj, ish-balerin në Trupën e Baletit të Kosovës dhe njëkohësisht drejtor i kësaj trupe.
Kjo shkollë nxori gjeneratat e para të balerinëve të cilët tani me sukses arrijnë të performojnë para publikut në Kosovë dhe në rajon.
Në fund duhet cekur se balerini më i njohur i shqiptar i ditëve të sotme është Ilir Shaqiri që vazhdon të korrë sukses në Itali. Baleti shqiptar ka kaluar periudha të ndryshme të cilat e kanë lënë atë disi të prapambetur duke filluar nga periudha e transicionit e deri në ditët tona. /zeri.info/